ILOILO CITY – Ginkumpirma sang Police Regional Office 6 nga deponent sang search warrant nga ginserbe sa lima ka mga balay kalakip na sa puluy-an ni Punong Barangay Noel Odicta sang Tanza Esperanza, City Proper ang pulis nga suspek man sa pagluthang kay PO1 Dorben Acap Jr. sa Dulonan Arevalo.
Sa interview sang Bombo Radyo, ginpahayag ni PRO-6 spokesperson Supt. Joem Malong nga si PO2 Melvin Mocorro ang nagpamatuod sa korte nga may mga armas kag iban pa nga kontrabando nga ginatago sa balay sang mga subject.
Suno kay Malong, wala man sang kuwestiyon kun si Mocorro ang nagserbe nga deponent apisar ini karon ang assigned sa ARMM Regional Mobile Force Battalion tungod nakaagi man ini assign diri sa rehiyon.
Gin-athag ni Malong nga boluntaryo nga ginhimo ni Mocorro ang pagsumpa sa affidavit.
Dugang pa ni Malong, mahimo man mangin deponent ang sin-o man pati na civillian, kag ang importante man lang diri nga mapamatud-an sa korte nga may tul-id siya nga ihibalo tuhoy sa mga subject nga kontrabando.
Si PO2 Mocorro ang ginatudlo nga suspek sa pag-ambush kay Po2 Dorben Acap Jr.
Ginpaathag naman sang isa ka law expert kun ano ang deponent kag ang papel sini sa pag-apply sang search warrant.
Suno kay Atty. Leo Superio, isa sa mga Bombo abogado, ang deponent amo ang mga tawo nga makapamatuod nga may kontrabando gid man kaangay sang druga, armas luthang, granada kag iban pa sa balay sang subject.
Tanan nga mga law enforcement officers suno kay Atty. Superio ang mahimo nga mangin deponent sa pag-apply sang mga search warrant.
Ang importante lang suno kay Atty. Superio nga makumbinsi mo ang husgado kag mapamatud-an ang imo ihibalo tuhoy sa mga subject.