ILOILO CITY – Indi mapasalig ni Police Regional Office (PRO) 6 director Chief Supt. John Bulalacao ang seguridad sang mga alkalde sa Western Visayas nga nalakip sa narco list ni Presidente Rodrigo Duterte.
Kasunod ini sang asud-asud nga pagpatay kanday Tanauan, Batangas Mayor Antonio Halili kag General Tinio, Nueva Ecija Mayor Ferdinand Bote.
Sa interview sang Bombo Radyo, ginpahayag ni Bulalacao nga matapos ginpaguwa ang listahan sang narco-politicians, gilayon ginmandu ni Presidente Duterte nga kuhaon ang mga pulis nga personal nga nagahatag sa ila sang seguridad gani indi niya ini mabali.
Ang mahimo lang sini suno kay Bulalacao amu nga mandu-an ang mga station commanders nga pasangkaron ang police patrol visibility ilabi na sa ginahamtangan sang mga opisyal.
Apang ginklaro sang PRO-6 chief nga indi ini mag-assign sang pulis nga personal nga mabantay sa alkalde.
Pahayag pa ni Bulalacao, kun patyon man ang mga nalakip sa narco list, wala man sang kasiguraduhan nga tungod ini sa druga tungod mahimo nga may iban man nga rason kaangay sang business rivalry kag daan nga hiligut-anon.
Gin-ehemplo ni Bulalacao ang pagpatay kay Mayor Bote nga wala man nalakip sa narco-list kag ang pagkonsiderar sang iban nga anggulo magluwas sa druga sa pagpatay kay Mayor Halili.