Alkalde sa Iloilo nga nalakip sa narco list ni Pres. Duterte nagakahangawa pero business as usual sa trabaho

ILOILO CITY – Nagakahangawa man ang isa sa mga alkalde sa probinsiya sang Iloilo nga yara sa narco list ni Presidente Rodrigo Duterte, sa asud-asud nga pagpatay kanday Tanauan City, Batangas Mayor Antonio Halili kag Mayor Ferdinand Bote sang General Tinio, Nueva Ecija.
Sa interview sang Bombo Radyo, ginpahayag ni Mayor Siegfredo Betita sang Carles, Iloilo nga sa nagakatabo, daw kaangay nga indi na sila luwas.
Nagapati ang alkalde nga posible pulitika ukon kahimuan sang mga grupo nga luyag gub-on ang Duterte administration, ang kamatayon sang nasambit nga mga opisyal.
Sa pihak sang kabalaka, ginpahayag ni Mayor Betita nga business as usual siya sa iya trabaho kag wala nagapaapekto sa kahadlok.
Si Mayor Betita ang isa sa mga ginhingadlan ni Presidente nga ginaalegar narco-politician sa Iloilo lakip sanday Calinog Mayor Alex Centena, Maasin Mayor Mariano Malones kag anay Iloilo City Mayor Jed Patrick Mabilog.