ILOILO CITY – Gindula ni Iloilo Governor Arthur Defensor Sr. ang kahangawa sang tatlo ka mga alkalde sa probinsya sang Iloilo nga nalakip sa narco-list ni Presidente Rodrigo Duterte.
Ini matapos ang asud-asud nga pagpatay kanday Tanauan, Batangas Mayor Antonio Halili kag General Tinio, Nueva Ecija Mayor Ferdinand Bote.
Sa interview sang Bombo Radyo kay Defensor, ginpahayag sini nga wala sang narco-politician diri sa Iloilo kun basehan ang listahan nga gina-uyatan ni House Speaker Pantaleon Alvarez.
Ang amo nga listahan amo man ang gina-uyatan subong ni Presidente Rodrigo Duterte suno sa gobernador.
Bangud sini, ginpahayag sang gobernador nga wala sang dapat kahangaw-an sanday Carles Mayor Sigfredo Betita, Maasin Mayor Mariano Malones kag Calinog Mayor Alex Centena.
Suno kay Defensor, napanas na ang pangalan sang tatlo ka alkalde sa listahan sang mga narco-politician.