ILOILO CITY – Magapatigayon sang re-assessment sang mga kasubaan ang Provincial Environment and Natural Resources Office (PENRO) sa Iloilo.
Ini matapos makabaton sang reklamo sa mga kontraktor sang mga proyekto nga ginakulang na ang materyales ilabi na ang balas kag bato.
Suno kay PENRO head Atty. Arturo Cangrejo, hibaluon nila kun nauli-an na ang mga quarry areas nga ginpaidalom sa moratorium kag kun makita nga mahimo na makuhaan, ila igarekomenda nga buksan.
Ini ang nakita nila nga lihok agud makabulig sa mga contractor suno kay Cangrejo nga nagakabalaka nga ma-terminate ang ila kontrata makatapos ginhatagan sang deadline ni Presidente Rodrigo Duterte.