ILOILO CITY – Sampaw-sampaw nga kaso ang ginpasaka sang Metro Iloilo Water District (MIWD) batok kay Mayor Jose Espinosa III.// Ini ang may kaangtanan sa pag-appoint sang alkalde sang bag-o nga set sang Board of Director sang MIWD apisar nga si Gov. Arthur Defensor Sr. ang may appointing authority.
Sa interview sang Bombo Radyo kay Atty. Roy Villa, legal counsel sang MIWD, ginpahayag sini nga duha ka counts sang usurpation of official function, isa ka count sang paglapas sa Anti-Graft and Corrupt Practices Act kag mga adminsitrative charges kasubong sang grave abuse of authority, gross negligence, gross misconduct kag act of contrary to laws ang ila ginpasaka batok sa alkalde.
Ginpahayag ni Villa nga gintapak ni Espinosa ang katungdanan ni Gov. Arthur Defensor Sr. nga amo ang may appointing authority sa pagpili sang Board of Director.
Antes kuntani mag-appoint ang alkalde sang board of directors suno kay Villa, kinahanglan anay nga may yara sang legal proceedings nga ginpatigayon agud ideklarar nga “invalid” na ang pamat-od sang Regional Trial Court nga nagahatag sang appointing authority sa gobernandor.
Magluwas diri, maathag suno sa abogado nga nagwaslik-poder ang alkalde bangud nga iya gin-agawan sang poder ang corporate secretary sang MIWD sa diin kinahanglan anay nga magpatigayon sang nomination process antes makapili sang mga board of directors.
Suno kay Atty. Villa, naghatag sang undue kag unwarranted benefits si Mayor Espinosa sa mga board of Directors nga iya gin-appoint bisan pa nga wala man sang vacancy sa position.