Pag-patay sa magkahagugma sa Antique ginapahayag may kaangtanan sa illegal drugs

ILOILO CITY – Patay ang magkarelasyon matapos nga ginluthang sa Barangay Cubay Napultan, Sibalom, Antique kaina sang kaagahon.
Ginkilala ang mga biktima nga sanday Atila John Villabert, 32 anyos, residente sang San Jose, Antique kag Nikki Latoga, 20 anyos, sang Barangay Bungsod sa banwa sang Sibalom.
Gikan sa San Jose ang mga biktima kag pauli na kuntani sa Barangay Bungsod, Sibalom sang matabo ang insidente.
Ginpahayag sa Bombo Radyo ni Senior Insp. Adolfo Pagharion Jr., hepe sang Sibalom Police Station, iligal nga droga ang ginalantaw nila nga motibo sa pag-patay sa mga biktima.
Suno kay Pagharion, high value target ang anay live-in partner ni Latoga nga nadakpan sadtong 2015 kag preso karon sa BJMP sa San Jose, Antique.
Apang wala madala sa kaso sadto si Latoga bangud menor-de-edad pa ini kag ginapahayag nga nagabusong.