ILOILO CITY – Ginpanindugan ni Iloilo City Congressman Jerry Treñas nga indi ini drug protector.
Kasunod ini sang mga gintu-ad ni Konseahal Plaridel Nava kay Police Regional Office 6 (PRO-6) director Chief Supt. John Bulalacao nga ang proliferation sang iligal nga droga sa siyudad ang nagsugod antes pa nagpungko si anay Mayor Jed Patrick Mabilog.
Sa interview sang Bombo Radyo, ginpahayag sang mamalidha nga mapamatud-an man sang iya record nga nahimo niya ang tanan sa kampanya batok sa iligal nga droga sang siya pa ang alkalde sang siyudad.
May record man suno kay Treñas kun pila ka drug operations ang nahimo sa iya termino.
Magluwas pa ini sa dako nga parte sang intelligence fund nga iya ginahatag sa anti-drug campaign.
Ang mga pulis nga naka-agi sa iya suno sa mamalidha makahambal kun ano siya ka istrikto batok sa iligal nga droga.
Dugang pa ni Treñas, wala siya sang may ginaprotektahan nga drug personalities bangud may mga kabataan siya nga indi niya luyag maggamit sang droga.
Ang laragway sini upod ang ginakabig drug personality nga si anay Barangay Kagawad Jesus “Jing-Jing” Espinosa ang natabo pagkatapos na sang eleksyon suno kay Treñas kun sa diin mamalidha na siya.