ILOILO CITY – Ginpanindugan ni anay Chief Insp. Charlie Sustento nga indi ini magpangayo sang pasaylo sa mga Biron.
Sa interview sang Bombo Radyo, ginpahayag ni Sustento nga wala sila sang sala rason nga indi sila magpangayo sang pasaylo.
May mga tawo suno kay Sustento nga nagapatunga sa ila nga luyag magpangayo siya sang pasaylo kag ang tatlo ka iban pa nga pulis nga na-dismissed, sa mga Biron.
Untatan na kuntani sila ni Biron suno kay Sustento bangud napa-dismiss naman sila sa trabaho kag may mga pamilya man sila.
Handa man pamatud-an ni Sustento nga si Fourth District Rep. Ferjenel Biron ang sa likod sang pagpakakas sa iya sa serbisyo.
Kasunod ini sang panghangkat sang mamalidha nga kun mapamatud-an ni Sustento nga may labot siya sa desisyon sang Ombudsman nga i-dismiss si Sustento kag tatlo ka iban pa nga pulis, maga-resign siya kag indi na magpadalagan gobernador sa probinsiya sang Iloilo.
Sa interview sang Bombo Radyo, ginpahayag sang anay police official nga basi kagton sang mamalidha ang siko sini kun iya mapamatud-an nga si Biron ang sa likod sang iya dismissal.
Apang wala siya nagapati suno kay Sustento nga maga-resign si Biron bangud dalok-dalok ini sa puwesto.
Suno sa anay chief of police, antes pa man siya ginturasok sang mamalidha kag ginkuwestyon ang iya otoridad nga magpatigayon sang checkpoint sa Dumangas sadtong 2016 election, gintawgan na siya sang iya mga superior nga gusto siya ipa-relieve sang kongresista bilang hepe sang Dumangas PNP bangud sa pagpati ni Biron nga bias siya.
Samtang ginpahayag ni Sustento nga matapos nabulabog ang pagpanilag sa iya sang tatlo ka pulis nga katapo sang Dumangas PNP, wala na may gasunod-sunod sa iya.
Una na ginpahayag ni Sustento nga closed-in bodyguard sang mga Biron ang tatlo ka pulis nga assigned sa Barotac Nuevo Police Station nga ginapahayag nagapanilag sa iya matapos ang ginaalegar pagpahog niya sa chief of staff ni Biron nga si Lemuel Fernandez.