ILOILO CITY – Magapakigsapol ang Moro Islamic Liberation Front (MILF) sa grupo sang Bangsamoro Islamic Freedom Fighters (BIFF) kag kay Moro National Liberation Front (MNLF) chairman Nur Misuari agud kumbinsihon ang mga ini nga suportahan ang Bangsamoro Organic Law (BOL).
Ginpahayag ni MILF vice chairman Ghazali Jaafar sa interview sang Bombo Radyo nga ila ipa-intyindi sa BIFF ang kaundan sang BOL.
Para ini sa kalinungan sang Mindanao suno kay Jaafar.
Luyag nila maresolba sa matawhay nga paagi suno kay Jaafar ang konflikto sa BIFF.
Nagapati man ang MILF nga masarangan nila resolbahon ang isyu sa BIFF nga indi na kinahanglan ang bulig sang national government.
Samtang sapulon man sang liderato sang MILF si Misuari nga ginbasura ang Bangsamoro Organic Law.
Apang wala pa sang timeline suno kay Jaafar sa natalana nila nga pagpakigsapol kay Misuari.
Una na ginpahayag sang MNLF chairman nga indi ini mag-upod sa Bangsamoro region, sa baylo hulaton na lang ang pagkambyo sang gobyerno sa federal form of government.