ILOILO CITY–Naghakot naman sang award ang Bombo Radyo Iloilo sa ginpatigayon nga 20th blood donors recognition and awarding ceremony sang Philippine Red Cross nga ginhiwat sa Iloilo Convention Center.
Nakuha sang Bombo Radyo Iloilo ang duwa ka award nga ginalakipan sang 4 star Hall of Fame kag ang Bloodiest Group award.
Sa interview sang Bombo Radyo kay Dr. Dennise Roy Pasadilla, blood center manager sang Philippine Red Cross Western Visayas Regional Blood center, ang Hall of Fame award ang pinakamataas nga pasidungog nga ginahatag sang Philippine Red Cross National Head Quarters samtang ang Bloodiest award naman ang ginahatag sa organisasyon nga may madamo nga units sang dugo nga nahatag.
Madamo man ang mga organisasyon nga nagadonar sang dugo apang sa gihapon ginkilala ang Bombo Radyo nga may pinakamadamo nga na donar nga units sang dugo sa Red Cross.
Lakip sa ginhatag sang Philippine Red Cross national headquarters amo ang testimonial plaque samtang ang local chapter ang naghatag sang appreciation pinaagi sa gold stars.
Dugang pa ni Pasadilla,  wala naganubo sa 1,000 units sang dugo ang ginahatag sang network.
Gin-agda man ni Passadilla ang nga grupo nga magpalapit sa Dugong Bombo sang Bombo Radyo agud makakolekta sang dugang pa nga units sang dugo.
Ang Dugong Bombo nga isa man sa mga mayor nga civic project sang Bombo Radyo Philipines nga ginapatigayun sa tagsa ka bulan sang Nobyembre.
Nangin tema sang awarding ceremony amo ang Dugo sang Dungganon: 20 years of honoring ilonggo blood donors.
Nahibaluan nga ang Bombo Radyo ang nagaisahanon nga istasyon sa Iloilo nga ginpasidunggan sang Red Cross.