ILOILO CITY–Bugal sang Probinsya sang Iloilo ang nangin performance sang Ilongga pitcher sang Philippine team sa Senior Softball World Series nga ginpatigayun sa Lower Sussex sa Delaware, USA.
Ini matapos nga ginpabilib sang Pilipinas ang bug-os nga kalibutan matapos ginlutos sang Tanauan Little League ang team sang Texas District 9 Little Leauge of Waco sa score nga 7-0.

Sa Interview sang Bombo Radyo kay Evelyn Palma, iloy ni Royevel Palma sang Pototan, Iloilo, ginpahayag sini nga proud ini sa iya bata.
Dugang pa Evelyn nga nakahibi ang iya bana nga si Jose Roy bangud sa kalipay sang nabalaitaan sini ang kadalag-an sang kamanghuran nga bata.
Gin-istorya man sini sa bombo Radyo nga dako ang nabulig sang softball sa pag-iskwela ni Royevel kag sang magulang sini bangud ginakulang man sila sa pangabuhi.
Handum ni Royevel na makahatag sang pasidungog sa pungsod kag magapangibabaw sa bug-os nga kalibutan.
Samtang, ginlaragway naman sang anay coach ni Royevel nga si Rogie Donguines sang Jalawod Elementary School, sa Zaragga, Iloilo nga bata palang ang mag-utod nga Palma nakitaan na ini sang abilidad sa nasambit nga hampang.
Ginpahayag ni Donguines nga sa tion nga yara ang Palma sisters, permi nagadaog ang ila nga team.
Nahibaluan nga isa ka mekaniko ang amay sang 16 anyos nga si Royevel samtang wala naman sang trabaho ang iya iloy.