ILOILO CITY–Nadakpan sa hot pursuit operation ang isa sa mga suspetsado sa paggulgol-patay sa isa ka barangay tanod  sa Brgy. Bagacay East, Maasin, Iloilo.
Sa interview sang Bombo Radyo kay Police Inspector  Jose Oswald Gatuslao, hepe sang Maasin Municipal Police Station, ginpahayag sini nga nadakpan nila ang suspetsado sa banwa sang Cabatuan, Iloilo.
Ini ang ginkilala kay Jeo Jhim Palermo, 23 anyos, tumandok Barangay Arac, Passi City  kag construction worker sa banwa sang Maasin, Iloilo.
Dugang pa ni Gatuslao, ginpatpat sang ni Palermo nga naga-inom sila sang isa pa gid ka suspetsado nga si Delmer Tingson, 21 anyos, tumandok sang Barangay Layog, Maasin, Iloilo.
Sa ulihi, nagpadulong sa ila ang biktima nga si Brgy. Tanod Emilio “Berting” Alido Macaya sang nasambit nga lugar kag nag-usisa kun taga diin ang mga ini.
Nagpangihi sang makadali si Palermo kag sang pagbalik sini, nakit-an na sini nga ginabuno ni Tingson ang biktima.
Ginhambalan ini ni Tingson nga indi magahod kag nagsaka sa ikaduha nga panalgan sang ginaakaayo nga apartment  si Palermo bangud sa kahadlok.
Apang gintawag ni Tingson si Palermo kag ginpapanaog kag nagpatuwang sa paghakwat sa biktima.
Matandaan nga nagahabil-habil na ang liog sang biktima sang ini ang masapwan sa talamnan.