ILOILO CITY–Dakop ang isa ka Barangay Kagawad sa Poblacion South,  Oton, Iloilo, matapos nakuhaan sang balor 70,000 pesos nga iligal nga druga.
Ang nadakpan ang ginkilala nga si Barangay Kagawad Milagros Sorongon, 65 anyos, kag pumuluyo sang nasambit nga lugar.
Sa interview sang Bombo Radyo kay  Police Chief Inspector Gervenzon Muyo, hepe sang Oton Municipal Police Station, iya ginpahayag nga ginpatigayon ang buy bust operation matapos natumod nga isa ka drug personality si Sorongon.
Nakuha kay Sorongon ang 20,200 pesos nga buybust money kag 4 ka dalagko nga sachet sang ginapatihan shabu nga ginabanta nagabalor sang 70,000 pesos.
Dugang pa ni Muyo nga naghalin sa Negros Occidental ang supply sang druga nga ginabaligya sang barangay  kagawad.
Pahayag pa sang hepe nga may tinawo si Sorongon nga amo ang nagadala sang illegal drugs diri sa Iloilo.
Nahibaluan nga si Sorongon ang isa ka first termer bilang barangay kagawad sa ila lugar.