ILOILO CITY–Nadakpan ang Fil-Pakistani nga High Value Target sang Philippine National Police (PNP) matapos ginserbehan sang search warrant sa kaugalingon nga balay sa Brgy. Tanza Esperanza, Iloilo City.
Ang subject ang ginkilala kay Hamza Pechon Kayani, 28 anyos, pumuluyo sang nasambit nga lugar.
Sa exclusive interview sang Bombo Radyo kay Police Superintendent Jonathan Pablito, hepe sang Police Station 1, ginpahayag sini nga lakip sa mga nakuha sa balay ni Kayani amo ang 16 ka sachet sang shabu, drug paraphernalia, mga bala sang .45 caliber pistol, duha ka magazine sang m16 riffle kag granada.
Suno kay Pablito, gingamit pa ni Kayani ang pangalan ni Bureau of Corrections (Bucor) Chief Ronald “Bato” dela Rosa kag ginpabugal nga magkumpare sila nga duha.
Si Kayani ang sadto anay nagapangatubang sang kaso nga murder bangud sa pagpatay sa isa ka real estate consultant sa compound sang The Q drive-in motel sa La Paz, Iloilo City apang sa ulihi, nag-angkon sang settlement ang suspetsado kag ang pamilya sang biktima.
Gin-athag naman ni Kayani nga indi iya ang mga nakuha nga mga armas, bala kag granada sa sulod sang iya balay.
Suno sa natungdan, may yara gid man siya sang mga ginahupotan nga armas apang ginapananag-iyahan ang mga ini sang iya pakaisa nga yara sa Canada.
Ang mga armas suno kay Kayani ang yara sa balay nila sa Dueñas, Iloilo kag nagkahanda siya  nga iturn-over ini sa mga otoridad.
Ginpanginwala man ni Kayani nga nagagamit ang shabu kag nagpabutyag sang kahandaan ng magpaidalom sa drug test.