ILOILO CITY–Wala nagasanto ang statement sang medico legal officer sang Philippine National Police (PNP) crime laboratory kag sang Ajuy Municipal Police Station tuhoy sa kaso sang criminology graduate nga nalumos sa reservior sa Brgy. Malayuan, Ajuy Iloilo.
Sa interview sang Bombo Radyo, ginpahayag ni Dr. Owen Lebaquin, medico legal officer Philippine National Police (PNP) crime laboratory, mahimo nga ginlampusan sang matalom nga bato sa agtang ang biktima nga si Niel Hervas, 24 anyos kag tumandok sang Brgy. Adcadarao, Ajuy Iloilo.
Suno kay Lebaquin, may mga lagob man sa kamot ang biktima kag mahimo ginhungod nga gintagbong sa reservior.
Ginpahayag pa ni Lebaquin nga kun nadagdag ang biktima, kuntani may yara ini sang gasgas sa nawong apang ang pilas nga nakit-an ang lacerated wound rason nga maathag nga tuga sang pagkalampos.
Samtang suno naman kay PO1 Aron Animas imbestigador sang Ajuy Miunicipal Police Station, ang pagkapilas ang agtang sang biktima ang mahimo tuga sang barbwire nga ginsuhutan sang nagdalagan ang biktima.
Suno kay Animas, gin-usisa man nila isa isa ang mga upod sang biktima kag nagasanto man ang pahayag sang mga ini nga nagdalagan ang biktima matapos nga nakibot sang ginlamposan sang upod sini sa ilimnan ang lamesa.
Mahimo suno sa pulis nga nadagdag ang biktima sa creek kag nakasandad rason nga nadagdag ang biktima sa reservior.