ILOILO CITY–Dead on Arrival ang isa ka pulis matapos nagbunggo ang ginamaneho nga motorsiklo sa steel railings sa Panit-an, Capiz.
Ang biktima amo si PO1 Amorlin de Asis Barruela, 33 anyos sang Brgy. Poblacion Ilaya, Maayon, Capiz kag assigned sa Aklan Provincial Mobile Force Company.
Sa interview sang Bombo Radyo kay PO2 Dale Davila sang Panit-an Municipal Police Station, iya ginpahayag nga halin sa Pontevedra si Barruela kag nagapapauli na sang natabo ang aksidente.
Patal nga pilas sa ulo ang naangkon ni Barruela matapos makabunggo sa steel railings sang dalan malapit sa Panit-an Public Market.
Nakasuksuk man sang helmet ang biktima apang ini ang nagtabog suno kay Davila.
Gindala gilayon sa ospital ang biktima apang wala na matabangan pa.