ILOILO CITY–Ginpaathag sang isa ka eskperto sa legal medicine ang proseso sa pagpaidalom sa pagbulong sa isa ka preso.
Ini ang kasunod sang paghingyo sang anay pugante nga Filipino-Pakistani nga si Hamza Kayani nga magpa hospital bangud sa pagtaas sang iya dugo kag sugar level.
Sa interview sang Bombo Radyo, ginpahayag ni Dr. Noel Martinez, retired Medico Legal Officer sang Police Regional Office (PRO) 6, nga sa tion nga magtaas ang dugo ukon sugar level sang isa ka preso, nagakadapat nga dal-on ang preso sa opistal agud madapatan sang nagakaigo nga pagbulong.
Suno kay Martinez, out patient lang dapat ang nasambit mga pasyente kag wala man nagakinahanglan nga ipa admit sang madugay.
Si Kayani ang nagpabilin sa West Visayas State University Medical Center sang isa ka semana matapos ginserbehan sang search warrant sa iya balay sa Tanza Esperanza Iloilo City Proper.
Sang gindala na sa Camp Martin Delgado kahapon, liwat naman nga nagreklamo si Kayani nga naglain naman ang iya pamatyag rason nga gindala sa Western Visayas Medical Center.
Ginkumpirma naman ni Police Superintendent Jonathan Pablito, hepe sang Police Station 1, nga yara na sa ila kustodiya si Kayani.
Sa interview sang Bombo Radyo kay Pablito, ginpahayag sini nga hugot nga seguridad ang ila ginapatuman agud indi makapalagyo si Kayani.
Gin-ako man ni Pablito nga gin-admit si Kayani sa Western Visayas Medical Center bag-o ginpreso kagab-i.
Una na nga ginkumpirma ni Pablito nga tuyo nga papalagyuhon si Kayani sa West Visayas State University Medical Center sa diin naga-obra bilang nurse ang iya iloy.