ILOILO CITY–Sampaw-sampaw nga kaso ang ginpasaka batok sa stepfather nga nagtiro-patay sa iya manak sa Maasin, Iloilo.
Sa interview sang Bombo Radyo kay PO3 Yvonne  Angelie Gumban, imbestigador sang Maasin Municipal Police Station, kaso nga murder kag paglapas sa Republic Act 7610 ukon Violence Against Women and Children ang igapasaka batok kay Jerold Guillermo.
Ginpahayag ni Gumban nga nakuhaan na sang affidavit ang duha ka witness nga mismo ang nanay kag tiya sang biktima.
Suno kay Gumban, naga-ilis ang biktima sa kwarto sang ginsudlan sang suspetsado kag ginpamangkot kun ano ang password sang iya cellphone.
Nagpamalibad ang biktima rason nga ginkuha sang suspetsado ang cellphone kag ginlampos sa salog.
Nagsinggit naman ang bata kag gintawag ang iya iloy nga gilayun naman nagsulod sa kwarto.
Ginhambalan naman sang iloy ang suspetsado nga mag-untat na sa pagpangguba sang gamit apang gintikwang siya sang suspetsado.
Ginhambalan naman sang iloy ang bata nga magpalagyo apang nakadanlog ang dalagita rason nga naabtan sang suseptsado kag gintiro.
Pahayag pa ni Gumban, duha ka beses nga ginluthang ang biktima nga nag-angkon sang pilas sa dughan kag ulo.
Nakuha naman sa crime scene ang empty shell sang armas nga gingamit ni Guillermo.