ILOILO CITY–Duha ang nadakpan sa buybust operation nga ginpatigayon sa Brgy. San Felix, Iloilo City.
Ang subject sang buybust operation amo si Jerson Dingcong, 24 anyos sang nasambit nga lugar.
Sa interview sang Bombo Radyo kay Police Superintendent jonathan Pablito, hepe sang Police Station 1, iya ginpahayag nga mismo ang kaupod ni Dingcong nga si Andrea Capungha, 20 anyos sang nasambit nga lugar, ang nagaserbe nga runner sang illegal drugs.
Ginapahayag nga sanday Dingcong kag Capungha ang magkahimbon sa pagbaligya sang illegal nga druga.
Nakuha sa duha ang 3 ka plastic sachet sang ginapatihan shabu, isa ka open plastic sachet sang ginapatihan shabu kag buybust money nga indi magnubo sa 500 pesos.
Ginatudlo naman ni Pablito nga source sang shabu amo ang napreso nga nga drug personality nga si Ednie Jimena nga downline sang Prevendido Drug Group.
Samtang, ginpanginwala naman ni Jerson Dingcong nga nagabaligya siya sang illegal drugs.
Sa interview sang Bombo Radyo kay Dingcong, iya ginpahayag nga nagakatulog siya sa ila balay sang hinali lang nga gintawag siya kag ginposasan sang mga pulis.
Gin-ako ni Dingcong nga sang una, nagagamit siya sang illegal nga druga apang nag-untat na pila ka tuig ang nagligad.