ILOILO CITY–Patay ang duha ka drug personalities matapos ginapahayag nagbato sa mga otoridad sa ginpatigayon nga buybust operation sa Brgy. San Pedro, San Jose, Antique.
Ang mga subject ang ginkilala kanday Jennifer Espora Gobatanga, 32 anyos, kag Gayrell Brillo Gobatanga, 38 anyos, lunsay pumuluyo sang Zone 3, Brgy. Ticud, Lapaz, Iloilo City.
Ang duha ang nabaklan sang poseur buyer sang gintingob nga pwersa sang Regional Drug Enforcement Unit , Antique Police Provincial Office kag San Jose Munuicipal Police Station.
Ginpahayag nga ginpalukpan  sang 38 caliber pistol sang subject nga si Jennifer samtang gintuyo naman nga habuyan ni Gayrell sang granada ang mga otoridad.
Nangin emosyonal naman ang live-in partner kag pamilya ni Jennifer matapos makumpirma sa Bombo Radyo nga lakip ang natungdan sa mga napatay.
Nagpadulong mismo sa istasyon sang Bombo Radyo si Marilou Gustilo mataos nga mabatian sa Bombo Radyo ang pangalan sang iya live-in partner.
Nagalibog man ang ulo ni Gustilo kun paano nakalab-ot sa probinsya sang Antique ang iya live-in kag napatay pa sa engkwentro sa mga otoridad sa ginpatigayon nga buybust operation.
Gin ako man niya  nga nagagamit sadto sang iligal nga droga ang iya live-in partner apang madugay na nga nag untat kag nagsungka naman pinaagi sa Oplan Tokhang.