BJMP, ginkumpirma nga ex-convict ang napatay nga drug personality sa Jaro, Iloilo City

ILOILO CITY–Kumpirmado nga ex-convict ang napatay nga subject sa buybust operation sa Lacson Avenue, Barangay Tacas, Jaro, Iloilo City.
Sa interview sang Bombo Radyo kay Jail Superintendent Vicente Papelera, jail warden sang Iloilo City District Jail, iya ginpahayag nga napreso bangud sa robbery with homicide kag direct assault si Gabriel Poblacion, 34 anyos, tumandok sang Jereos Dike, La Paz, Iloilo City apang temporaryo nga nagapuyo sa Lacson Avenue, Barangay Tacas, Jaro, Iloilo City.
Suno kay Papelera, sang yara sa sulod sang presuhan  masami nga nagagamit sang cellphone Poblacion.
Gin-athag man ni Papelera nga wala nila maaktuhan nga nagabaligya sang illegal drugs si Poblacion sa sulod sang jail facility.
Wala naman sang may nakuha nga impormasyon sa cellphone ni Poblacion.