ILOILO CITY–Patay ang isa ka drug surrenderee matapos gintiro sang riding-in-tandem suspect sa Zone 4, Brgy. Calumpang, Molo Iloilo City.
Ang biktima ang ginkilala kay Don Azucena , 39 anyos kag  pumuluyo sang Brgy. North Baluarte, Molo, Iloilo City apang temporaryo nga nagapuyo sa Brgy. Calumpang, Molo, Iloilo City.
Sa interview sang Bombo Radyo kay Ivory Pelayo, live-in partner sang biktima, iya ginpahayag nga nagabantay sila sang jeep pakadto sa Brgy. North Baluarte sang hinali lang nga may nagtiro sa iya live-in partner.
Nagahuray-ad na si Azucena kag nagapaligo sa kaugalingon nga dugo sang makita ni Pelayo.
Sunu kay Pelayo, nagasakay sa itom nga motorsiklo ang nagluthang kay Azucena.
Ginkumpirma naman niya nga isa ka drug surrenderee ang biktima kun sa diin sang 2016 pa nagsungka sa Oplan Tokhang kag nagpaidalum sa rehabilitation program.
Sunu naman kay Danilo Azucena, amay sang biktima, iya ginpahayag nga madugay na nga nag-untat sa paggamit kag pagbaligya sang iligal nga droga ang iya bata.
Dugang pa sang amay nga nagabantay na lamang sang tyangge kag nagabaligya sang arrozacaldo ang iya bata matapos nga nagpaidalum sa rehabilitation program.
Wala man siya sang hinalung-ong kun nagbalik  sa bisyo ang iya bata.