ILOILO CITY–Gintugyan sa City Legal Office  kag National Historical Commission of the Philippines (NHCP) ang pagpasaka sang kaso kriminal batok sa kura paroko sang St. Anne Parish sa Molo, Iloilo City.
Ginareklamo si Msgr. Maurillo Silva bangud sa pagrenovate sang Convento de Molo nga wala sang pahanugot sa NHCP.
Sa Interview sang  Bombo Radyo kay Iloilo City Councilor Candice  Tupas,  chairman sang Committee on Tourism Culture and Historical Affairs sa Iloilo City Council, iya ginpahayag nga ila ginhingyo ang City Legal Office kag ang NHCP nga tumuron kun ano ang ginlapas ni Silva agud gilayon nga mapasakaan sang  kaso santo sa penal provision sang Republic Act 166.
Ang sin-o man nga magalapas sa RA 166 ang may silot nga 200,000 pesos ukon pagkapreso.
Dugang pa ni Tupas, wala naman nagtambong sa duha ka commitee hearing  si Silva.
Naghatag naman sang mga sulat kag ginatawgan si Silva apang wala sa gihapon nagasapak ang pari.
Samtang, gintalakay man sa session sang Iloilo City Council ang reply sang acting executive secretary sang National Historical Commission of the Philippines (NHCP)  sa sulat sang  kura paroko sang St. Anne Parish sa Molo Iloilo City nga si Rev. Msgr. Maurillo Silva.
Ginapamangkot ni Silva kun nga-a naghatag sang ceased ang desist order ang NHCP.
Sa reply letter sang pari,  ginpanindugan ni si Msgr. Silva nga nagasunod siya sa requirements  nga ginpagwa san City Govenrment.
Nahibaluan nga ginrekomandar sang architect sang NHCP nga islan lang ang glass window sang capiz shells kag ang pag-ilis sang green policarbonate sa puti.
Magahatag naman sang conditional lifting sang cease and desist order kun mapasa ni Msgr. Silva ang tatlo ka mga kondisyon nga ginalakipan sang pagpasa sang development plan sa pagkaayo sang convento kag pag-ilis sang glass window sa capiz shell kag sang green policarbonate sa puti.
Ginpahayag naman ni Iloilo City Councilor Plaridel Nava nga indi na mapa-untat ang cease and desist order bangud nakumpleto na ang proyekto.