ILOILO CITY–Kapin lang sa 2 million pesos ang gingasto sang Iloilo City Government para sa Iloilo City Charter Day Celebration sang August 25, 2018.
Sa interview sang Bombo Radyo kay Iloilo City Mayor Jose Espinosa III, iya ginpahayag nga ang gingasto subong nga tuig amo man ang gingasto sang syudad sang nagliligad nga mga charter day celebration.
Suno kay Mayor Espinosa, wala na sang may mga float parade bangud nga tuman ka mahal ang gasto para sa design.
Gin-athag man ni Espinosa nga ang pagsaulog sang Charter Day ang indi man dapat nga garboso.
Sa pagkamatuod suno kay Espinosa, ang mga costumes nga gingamit sang mga empleyado sa parada ang wala na nadala sa budget sang syudad.
Sa subong nga tuig suno sa alkalde, nangin masadya ang pagsaulog sang Iloilo City Charter Day bangud sa mga aktibidad kasubong sang Miss LGBT, Lin-ay sang syudad sang Iloilo, Street dance competition, Senior Citizen’s Day kag Sister’s Cities Night.
Samtang, nagdangat sa P4 million ang ginpain nga budget sang Syudad sang Iloilo para sa Charter Day Celebration.
Ang annual budget ang ginalakipan sang 200,000 pesos nga annual budget sang syudad kag 3.8 million pesos nga supplemental budget.
Sa 4 million pesos, naglab-ot sa 1.9 million pesos ang gin cash-advance sang syudad.
Ini ang ginalakipan sang:
-120,000 pesos para sa Family Day
-155,000 pesos para sa Adlaw sang katigulangan
-299,245 pesos para sa LGBT activities
-371,000 pesos para sa Lin-ay sang syudad sang iloilo
-510,000 pesos para sa street dance competition
-100,000 pesos para sa PWDs sports fest
-61,000 pesos para sa Binalaybay Contest and Tourism Promotions Photo
-165,000 pesos para sa pagkaon sang mga bisita sa Sister’s Citites Night
-40,000 pesos para sa Musika kontra druga
-4,000 pesos para sa Misa
-55,000 pesos para sa Mayor Joe’s Autoshow 2018
-50,000 pesos para sa Mass Wedding
-10,000 pesos para sa Ka-tropa Session
-200,000 pesos para sa Most Outstanding City Government Employee
-30,000 pesos para sa Charter Day Shoot Fest kag
-64,600 pesos para sa Sports Fest for Drug Surrenderee
Kun sumahon, may yara pa sang 2.1 million pesos ang nabilin nga dapat i-reimburse sang City Government.