Mabaskog nga hangin kag ulan ang ginatan-aw nga  rason sa pagsadsad sang isa ka cargo ship sa kaagatan sang San Jose, Antique.
Sa interview sang Bombo Radyo kay Lt. Commander Ramil Palabrica, taghambal sang Philippine Coast Guard (PCG)  Western Visayas, iya ginpahayag nga naka-angkorahe na ang barko nga MV Star of Liberty sang tinalikdan pa nga semana apang nahukas ang angkla rason nga nagsadsad ini.
Gindugang pa ni  Palabrica nga naghalin sa Cebu ang  barko nga may dala nga 22,000  ka sako sang semento kag magadungka kuntani sa  port sang nasambit nga lugar.
Naluwas naman suno kay Palabrica ang 22 ka mga crew lakip na ang kapitan kun sa diin 10 ang yara sa kustodiya sang PCG samtang ang 12 naman ang gindala sa Antique Provincial Hospital bangud sa minor nga mga kapilsan.
Ginaaan-aw man ang posibilidad sang oil spill bangud nagapabilin sa gihapon sa area ang MV Star of Liberty.
Magapakig-angot naman sa kompaniya ang coast guard para sa towing sang barko kun sa diin pagabutungon ini sang tugboat padulong sa safe area.