ILOILO CITY–Pormal na nga nagdeklarar sang pagpakig-alyansa kay 4th Congressman Ferjinel Biron si Guimbal Mayor Oscar “oca” Garin.
Sa interview sang Bombo Radyo, ginpahayag ni Mayor Garin nga ila nakasugtan ni Congressman Biron nga amo ang magapadalagan bilang gobernador sa eleksyon sa tuig 2019 batok kay 3rd District Congressman Arthur ‘Toto’ Defensor Jr.
Suno kay Garin, ginhimo niya ang ini nga desisyon sa basehan nga mas convenient kag mas makapaayo indi lang para sa mga Garin kundi para sa iban man nila nga kaupdanan sa pulitika.
Gndugang naman ni Garin nga lakip sa mga nakasugtan sa tunga nila ni Biron amo nga mangin first nominee sang Party list nga AAMBIS OWWA si Vice Governor Christine Garin kag second nominee naman si anay Cong. Junjun Biron.
Nakasugtan man nga mangin kandidato sang partido ni Biron ang tanan nga kandidato sang mga Garin sa pagka-kongresista kag Sangguniang Bayan members.
Ginhimo ni Garin ang deklarasyon sa pagtililipon sang Nacionalista Party kag Hugpong ng Pagbabago Coalition Party sa siyudad sang Iloilo.
Samtang, Nagpangayo sang pasaylo si Guimbal Mayor Oscar Garin kay Governor Arthur Defensor Sr.
Ginpahayag ni Garin nga bag-o ang deklarasyon, naghatag siya sangpagtahod kay Defensor.
Gindugang pa ni Garin nga sa iya edad subong, indi na niya maluyag nga madulaan pa sang abyan.
Suno pa sa iya nga antes ang iya deklarasyon, personal nga ginpadulungan sang iya bata nga si 1st district Congressman Richard Garin kag tiayon nga si anay Health Secretary Janetet Garin si Governor Defensor sa iya puluy-an agud personal nga maistorya ang gobernador.