Kura Paruko sang St. Anne Parish sa Molo, Iloilo City magapangatubang sang kaso kriminal bangud sa pagrenovate sang convento nga wala sang pahanugot gikan sa NHCP

ILOILO CITY–Kaso kriminal ang ipasaka batok sa kura paroko sang St. Anne Parish sa Molo, Iloilo City may kaangtanan sa pagparenovate sang Convento de Molo nga wala sang pahanugot gikan sa National Historical Commission of the Philippines (NHCP).
Sa interview sang Bombo Radyo kay Iloilo City Councilor Plaridel Nava, iya ginpahayag nga pagkapreso sang 10 ka tuig kag pina nga indi magnubo sa 200,000 pesos ang mahimo isilot kay Msgr. Maurillo Silva.
Magluwas sa pagkapreso kag pina, wala man sang probation nga ihatag sa Kura Paruko suno kay Nava. Gintawag ni Nava nga kabutigan ang ginpahayag ni Silva nga wala siya sang may ginlapas nga layi.
Sa pagpaathag sang Konsehal, ginlapas ni Silva ang ceast and desist order nga ginpaguwa sang City Engineers Office.
Bag-o maguba ukon makaayo ang isa ka historical site, dapat anay nga magapasa sang kumpleto nga requirement bag-o mahatagan sang pahanugot sang NHCP.
Ang natabo suno sa Konsehal amo nga bisan may ceast and desist order, padayon sa gihapon ang pagrenovate sang Convento de Molo.