ILOILO CITY–Nabatyagan na ang inflation ukon pagmahal sang presyo sang mga pagkaon ilabi na sang bugas sa Iloilo.
Sa interview sang Bombo Radyo kay Oliver Cambas, provincial manager sang National Food Authority (NFA), iya ginpahayag nga sang nagligad nga semana, P49 lang kada kilo ukon P99 pesos ang gantang sang pinakamahal nga presyo sang bugas.
Sa subong, ang pinakabarato nga bugas ang nagadangat na sa P51.52 kada kilo ukon P117 pesos ang gantang.
Paathag ni Cambas, ang mga bugas ang ginabyahe pa kag bangud mataas ang preso sang gatong, ini ang ginapatong sa mga pagbaligya sang bugas.
Suno kay Cambas, kalabanan sa mga suplay sang bugas sa Iloilo ang naghalin lang sa probinsya apang ang mga sinandomeng kag iban nga mga special rice ang naghalin pa sa mga Mindoro.