ILOILO CITY–Balor 50,000 pesos nga shabu ang nakuha sa balay sang bata ni Remedios Rumualdez, Agusan Del Norte Mayor Nilo Soliva matapos ang ginpatigayon nga buybust operation sa Bankers Village, Brgy. Tabuc Suba, Jaro, Iloilo City.
Sa interview sang Bombo Radyo kay Police Senior Inspector Kenneth Bermejo, pinuno sang Regional Drug Enforcement Unit (RDEU), iya ginpahayag nga lakip sa mga nakuha sa balay ni Clint Soliva amo ang walo ka dalagku nga sachet sang suspected shabu balor 50,000 pesos, 5,200 pesos nga buybust money, carbine, pulo ka magazine, isa ka bag nga puno sang bala sang carbine, isa ka lata sang 45 caliber pistol kag homemade shot gun.
Lakip sa mga gindakop suno kay Bermejo amo sanday Julie Diveles, Ryan Constantino nga runner ni Soliva, kag Ronsalie Jilangga nga live-in partner ni Soliva.
Gin-athag naman ni Bermejo nga yara sa Mentro Manila si Clint Soliva sang ginpatigayon ang buybust operation.
Samtang, magluwas sa illegal drugs, may nakuha man nga high powered fireams.
Sa interview sang Bombo Radyo kay Atty. Modesto Martin Mamon, legal counsel sang pamilya Soliva, iya ginpahayag nga ginpahibalo lang siya sang pamilya nga hinali lang ginsulod sang mga armado nga tawo ang ila balay.
Magluwas nga armado, nakasuksuk pa sang facemask ang nga ginapahayag katapo sang RDEU.
Ginpahayag dugang ni Mamon nga kun matuod nga wala sang kontrobersiya nga nagakatabo, kuntani ginpahanugutan siya kaupod ang mga katapo sang media nga makasulod sa balay agud nga magsaksi sa natabo nga buybust operation.
Makatalagam suno kay Atty, Mamon bangud nga bisan siya nga legal counsel ang kasubong nga wala sang may mahimo agud pangapinan ang iya kliyente.
Sa pagkamatuod suno sa abogado, wala man nagpakilala sa iya ang mga armado nga tawo bilang pamatuod nga lehitimo nga buybust operation ang natabo.