Ginkumpirma sang Philippine Drug Enforcement Agency (PDEA) 6 nga may yara sang illegal drug transaction sa Iloilo District Jail sa Brgy. Nanga, Pototan, Iloilo.
Sa interview sang Bombo Radyo kay David Garcia, taghambal sang PDEA-6, iya ginpahayag nga may yara sang nakalab-ot nga impormasyon sa ila nga may nagaluntad nga transakyon sang iligal nga droga sa sulod sang nasambit nga presuhan.
Ang nasambit nga report suno kay Garcia ang ila pa nga ginahibalo kun matuod ukon indi.
Dugang pa ni Garcia, kinahanglan nga may yara gid sang tawo nga handa magsulod sa presuhan agud manilag sa mga hulag sang mga preso.
Sa pihak sini, ginpahayag ni Garcia nga yara sang ginapatigayon nga jail drug clearing ang PDEA kun sa diiin may ginasunod nga mga proseso bag-o ideklarar nga drug free ang isa ka jail facility.