ILOILO CITY–Ginkumpirma ni Iloilo City Mayor Jose Espinosa III nga ginpahalin sa pwesto ang administrador sang Iloilo City Community College (ICCC).
Sa interview sang Bombo Radyo kay Mayor Espinosa, iya ginpahayag nga temporaryo lamang nga ginkakas sa pwesto si Matilde Treñas Octavio bilang administrador sang nasambit nga buluthu-an.
Suno sa alklade, nakabaton siya sang mandu gikan sa Ombudsman nga magpatigayon sang imbestigasyon tuhoy sa ginareklamo sang mga magtutudlo kag estudtante sang ICCC.
Ang city government ang ginhatagan lamang sang lima ka adlaw sunu kay Espinosa agud nga magsabat sang nasambit nga reklamo.
Nagtukod naman sang komitiba ang syudad agud usisa-on ang ginapahayag anomaliya kag mismanagement sa ICCC.
Ang komitiba ang pamunu-an ni Atty. Hernando Galvez, City Adminsitrator, kaupod ang city legal officer kag duha pa gid ka mga abogado sang syudad.
Normal lamang sunu sa alkalde nga ginakakas sa pwesto ang isa ka tawo nga subject sa imbestigasyon.
Temporaryo naman nga gin-assign ni Espinosa si anay Konsehal Perla Zuleta nga amo ang magadumala sa ICCC.
Samtang, gin-athag sang alkalde nga wala sang pamulitika sa iya pagpahalin kay Octavio.
Suno kay Espinosa, ginsunod lamang niya ang mandu sang Ombudsman.
Bangud sini, balik anay sa Iloilo City Hall ang duty ni Octavio bilang Executive Assistant ni Mayor Espinosa.