ILOILO CITY–Nagalaum ang Department of Education (DepEd) nga mahatagan sang kabilinggan ang mga manunudlo kadungan sang pag-umpisa sang National Teachers Month.
Ang National Teachers Month ang ginasaulug umpisa sang September 5 tubtub October 5.
Sa interview sang Bombo Radyo kay DepEd Undersecretary Tonisito Umali, iya ginpahayag nga katuyuan sang selebrasyon amo nga nga makilala ang mga manunudlo.
Ang mga manunudlo ang may yara sang kritikal nga katungdanan sa pagtudlo sa mga kabataan.
Suno kay Umali, ginagiyahan man sang mga manunudlo ang mga estudyante agud matuman ang ila handum sa kabuhi.
May ginapatigayun naman nga monthlong activities suno kay Umali agud makilala ang mga hininuan sang mga manunudlo.
Gindugang man ni Umali nga ang profession nga manunudlo ang ang makabig nga dungganon.
Samtang, madamo sang programa kag budget nga gintalana ang DepEd para sa mga manunudlo.
Suno kay Umali, may budget ang mga manunudlo kaangay sang chalk allowance nga nagadangat sa 2,500 pesos sang 2017 kag 3,500 sini nga 2018, clothing allowance nga 5,000 pesos sang 2017 samtang 6,000 pesos naman sini nga 2018.
Sa masunod nga tuig 2019 mahimo nga magtaas pa ang take home sang mga manunudlo bangud sa implementasyon sang salary standardization law.
Ginalauman man suno kay Umali nga maaprubahan sang kongreso ang National Teachers Month bonus kag ang budget nga ginapasulod sa General Appropriations Act para  sa annual physical examination sang mga manunudlo.