ILOILO CITY–May yara sang natukiban nga kapaltahan ang Iloilo City Peace and Order Council sa intelligence monitoring sang Philippine National Police (PNP).
Sa interview sang Bombo Radyo kay Konsehal Joshua Alim, iya ginpahayag nga palpak ang intel monitoring sang PNP.
Ini ang kasunod sang pagreklamo sang Iloilo City Police Office (ICPO) nga may yara sang mga barangay officials ang wala nagabulig sa ila ilabi na sa tion nga may inventory sa ila ginpatigayon nga drug operations.
Sunu kay Alim, wala nagapirma ang mga barangay official bilang witness bangud sa ginpasuni lain nga mga pangalan ang nasulat sa inventory sheet.
Ginsaway man ni Atty. Ferdinand Panes sang Department of Interior and Local Government (DILG) -Iloilo City ang kapulisan tungud sa amo man nga kapaltahan.
Hamlimbawa suno kay Alim, ginapanindugan man sang pamilya ni Alex Blanca sang Brgy. Boulevard, Molo, Iloilo City nga napatay sa anti-drug operation sang Regional Drug Enforcement Unit (RDEU), nga isa ka mistaken identity ang natabo.
Bagud sa kahadlok, nagapang alang-alang na ang pamilya nga magpasaka sang kaso.
Gin-ako man ni Alim nga siya mismo ang nakaagi man nga nabiktima sang mistaken identity matapos nga ginsundan sang PNP ang iya ginamaneho nga salakyan bangud sa ginapasuni pagtago niya sang kriminal.
Kinahanglan sunu kay Alim nga kaayuhon sang kapulisan ang intel monitoring agud indi madalahig ang mga inosente kag mahatagan sang kahigayunan nga magbag-o ang mga nagsungka sa Oplan Tokhang.