ILOILO CITY–Balor 50,000 pesos nga shabu ang nakuha sa balay sang bata ni Remedios Rumualdez, Agusan Del Norte Mayor Nilo Soliva matapos ang ginpatigayon nga buybust operation sa Bankers Village, Brgy. Tabuc Suba, Jaro, Iloilo City.
Sa interview sang Bombo Radyo kay Police Senior Inspector Kenneth Bermejo, pinuno sang Regional Drug Enforcement Unit (RDEU), iya ginpahayag nga lakip sa mga nakuha sa balay ni Clint Soliva amo ang walo ka dalagku nga sachet sang suspected shabu balor 50,000 pesos, 5,200 pesos nga buybust money, carbine, pulo ka magazine, isa ka bag nga puno sang bala sang carbine, isa ka lata sang 45 caliber pistol kag homemade shot gun.
Lakip sa mga gindakop suno kay Bermejo amo sanday Julie Diveles, Ryan Constantino nga runner ni Soliva, kag Ronsalie Jilangga nga live-in partner ni Soliva.
Gin-athag naman ni Bermejo nga yara sa Mentro Manila si Clint Soliva sang ginpatigayon ang buybust operation.
Samtang, nagpaathag ang RDEU kun nga-a naulihi ang pagpasulod sang mga katapo sang media sa balay sang pamilya Soliva.
Suno kay Bermejo, nadugayan bag-o ginpasulod ang mga katapo sang media kag ang legal counsel sang pamilya Soliva nga si Atty. Modesto Martin Mamon bangud nga ila pa nga ginpat-ud kun bala may explosives nga ginahuptan ang pamilya Soliva.
Nakabaton na sila nga daan sang impormasyon suno kay Bermejo nga magluwas sa mga armas-luthang, may yara pa sang explosives sa sulod sang balay sang pamilya Soliva.
Bangud sini, ila anay nga ginkordon kag gin-usisa ang palibot bag-o ginpahanugutan ang mga katapo sang media nga makasulod.