ILOILO CITY–Ginsaysay sang right hand ni Clint Soliva kun paano sila nadakpan sa buybust operation nga ginpatigayon sang Regional Drug Enforcement Unit (RDEU).
Sa interview sang Bombo Radyo kay Ryan Constantino, nagaserbe nga tinawo kag drug runner ni Soliva, iya ginpahayag nga bag-o pa man natabo ang buybust operation, naka-transaction na niya nga daan ang iya abyan nga amo ang magabakal sa iya sang shabu.
Nagkitaay sila sang iya abyan sa distrito sang Mandurriao sa diin ginpahayag ni Constantino nga nagsakay siya sa salakyan sang iya abyan agud nga magpadulong sa balay ni Clint Soliva agud kuhaon ang shabu kay Rosalie Gilangga nga live-in partner ni Soliva.
Sang nakalab-ot na sila sa Old Airport, Mandurriao, hinali lang nga may nagbalabag sa ila kag didto na niya nahibalu-an nga mga pulis asset ang iya abyan.
Bangud nga wala na sang may mahimo, wala na nagbato pa si Constantino tubtub nga nakalab-ot sa balay ni Soliva.
Ginpanginwala man ni Constantino nga nagpalagyo siya sa suldo sang compound bangud nga sa pagkamatuod suno sa iya, hinali lang nga ginsulod sang mga pulis ang balay kun sa diin naga-istar si Jiangga.
Wala na siya makahibalo pa kun paano nakita ang mga bulto sang shabu, mga armas-luthang kag bala.