ILOILO CITY–Ginpatpat ni Iloilo City Councilor Love-love Baronda kun ano ang  kaundan sang iya ginduso nga Iloilo City Parental Responsibility Ordinance.
Ini matapos nga napasar sa Sangguniang Panlunsod ang nasambit nga ordinansa kag natalana nga ipatuman sa Enero 1,2019.
Sa interview sang Bombo Radyo kay Baronda, iya ginpahayag nga katuyuan sang pagpatuman sang ordinansa nga mapangapinan ang  kabataan gikan sa pabaya nga ginikanan.
Ang  ordinansa ang nagasakop sang kabataan nga naga-edad 18 anyos panubo kag 18 anyos pasaka apang indi makasarang nga magtatap sa ila kaugalingon; tanan nga indibidwal nga ginatungdan ang  parental authority kag responsibilidad sa kabataan lakip na ang barangay, komunidad kag  talatapan sa idalom sang city government.
Pila sa mga akto sang pagpabaya sang ginikanan nga mahimo mangin basehan sang paglapas sa ordinansa amo ang pagpahanugot sa ila kabataan nga mag-intra sa sugal, magpahubog kag magpanigarilyo.
Mangin ang pagpabaya sang ginikanan sa ila mga kabataan sa eskwelahan kag itugyan ang ila responsibilidad sa iban ang makabig man nga paglapas sa ordinansa.
Samtang, may kabalo naman nga silot sa mga magalapas sa  ordinansa.