ILOILO CITY–Ginkustodiya sang Women and Children’s Protection Desk sang Mandurriao Police Station ang duha ka mga menor de edad nga suspek sa pag pang hold-up sa isa ka taxi driver sa Westwoods Subdivision, Brgy. Dungon C, Mandurriao, Iloilo City.
Sa interview sang Bombo Radyo kay Tanod Commander Ricardo Jalaman sang Bgry. Bakhaw, Mandurriao, Iloilo City, iya ginpahayag nga nagapuyo ang isa sa ka suspetsado sa Zone 3 sa ila lugar.
Ginkakibot man ni Jalaman ang balita nga nagpanghold-up sang isa ka taxi driver si alyas Toto, bangud sa iya nga pagkilala, isa man ka mabuot nga bata ang menor de edad.
Maayo naman suno kay Jalaman ang pagpadako kay alyas Toto kag mahimo nadala lang sang grupo nga mga pamatan-on.
Nahibaluan nga ang amay ni alyas Toto ang napreso sa Iloilo District Jail sa Brgy. Nanga, Pototan, Iloilo bangud sa kaso nga ginapangatubang may kaangtanan sa iligal nga druga samtang ang iloy naman sang menor de edad ang yara man sa Pototan.
Ang isa pa gid ka suspetsado nga menor de edad ang tumandok sang Brgy. Bakhaw Mandurriao, Iloilo City.