ILOILO CITY–Ginkalipay sang Local Government Unit (LGU) sang Passi City ang nabaton nga Seal of Good Local Governance Award halin sa Department of the Interior and Local Government (DILG).
Sa interview sang Bombo Radyo kay Passi City Mayor Jesry Palmares, iya ginpahayag nga tuman ang iya kalipay sa naangkon nga pasidungog.
Sunu kay Palmares, isa ka daku nga dungog ang ginhatag sang DILG.
Dugang pa niya, ang nasambit nga award ang isa sa mga apat ka prestihiyoso nga mga award nga nahatag na sa siyudad sang Passi.
May yara sunu sa alkalde sang mga nagakaigo nga criteria nga ginasunod agud maangkon ang award kasubong sang updated kag liquidated nga finances; acomplishments bilang local excecutive sa tanan nga government offices kasubong sang Agriculture, Health kag Education; disaster preparedness kag kinahangalan nga may yara sang continuity sa mga lokal nga proyekto.
Nahibaluan nga lakip sa mga siyudad nga nahatagan sang Seal of Good Local Governance Award sa Region 6 amo ang  San Carlos City, Victorias City kag Silay City sa Negros Occidental.
Magluwas sa Passi City, pito naman ka mga banwa sa probinsiya sang Iloilo ang nagbaton sang kaangay man nga pasidungog.
Ini ang ginalakipan sang Anilao, Binggawan, Oton, Zarraga, Concepcion, Duenas kag Lambunao.