ILOILO CITY–Liwat naman nga ginkansela ang klase sang University of San Agustin sa General Luna St. Iloilo City matapos nga nakabaton naman sang bomb threat.
Sa mensahe nga ginpadala ni Abdalmalek Al-Ahdal sa facebook page sang University of San Agustin, iya ginpahayag nga ang Mendel Hall sang unibersidad ang magalupok subong ukon bwas nga adlaw kag ginakaakig niya ang sistema sang edukasyon sa nasambit nga unibersidad.
Suno naman kay Fr. Williener Jack E. Luna, OSA, Director sang Philanthropic, External and Alumni Relations (PEAR) sa University of San Agustin, iya ginpahayag nga mas makapaayo nga ipauntat ang klase.
Nagpangayo man siya sang paghangop sa mga estudyante kag mga ginikanan sa ginapangatubang nga problema sang nasambit nga eskwelahan.
Nahibalu-an nga ini na ang ika-tatlo nga asud-asud nga adlaw nga may bomb threat sa syudad sa diin una nga ginpuhag ang Ateneo de Iloilo sa diin may nakit-an sa sulod sang eskwelahan nga Improvised Explosive Device (IED).
Kahapon naman nakabaton sang bomb threat ang University of San Agustin matapos nakabaton sang mensahe ang facebook page sang unibersidad pinaagi kay Felix Tan nga may bomb nga yara sa Rada Hall sa sulod sang iskwelahan.
Samtang, suno naman kay Police Senior Supt Jonathan Pablito, hepe sang Police Station 1, malayo ang posibilidad nga bombahan ang University of San Agustin.
Ini bangud suno kay Pablito tuman ka hugot ang siguridad nga ginapatuman sa eskwelahan.