ILOILO CITY–Gilayon nga nagresponde ang Public Safety and Transportation Management Office (PSTMO)  sa General Luna St., City Proper matapos nga ginpuhag naman liwat sang bomb threat ang University of San Agustin.
Sa interview sang Bombo Radyo kay Jeck Conlu, pinuno sang PSTMO, iya ginpahayag nga ginmanduan niya ang public safety team nga magbulig sa pagsiguro nga hilway ang kahimtangan sang mga estudyante.
Nahibalu-an nga kahapon ginpuhag man sang bomb threat ang nasambit nga unibersidad pinaagi sa isa ka certain Felix Tan nga naghatag sang mensahe sa facebook page sang nasambit nga unibersidad nga may bomba sa Rada Hall sa diin nahamtang ang College of Law.
Sang nagligad nga adlaw, nakabaton man sang bomb threat ang pamunu-an sang Ateneo de Iloilo sa Brgy. San Rafael, Mandurriao, Iloilo City.