ILOILO CITY–Gin-athag sang Philippine National Police (PNP) nga nag-agi sa validation process ang pagbansag sa probinsya sang Guimaras bilang transhipment point sang ilegal nga droga.
Sa interview sang Bombo Radyo kay Police Superintendent Joem Malong, tagphambal sang Police Regional Office (PRO) 6, iya ginpahayag nga kuntani indi lang maglain ang buot sang mga tumandok sa pagtawag sa Guimaras nga palaagyan sang ilegal nga droga.
Suno kay Malong, wala nagapinalagpat si PRO Director Police Chief Superintendent John Bulalacao sa ginapaguwa nga impormasyuon bangud nag-agi ini sa nagakaigo nga proseso.
Mismo ang mga nadakpan nga drug personalities ang naga-ako suno kay Malong nga halin sa Bacolod, ginapaagi  ang droga sa Guimaras bag-o dal-on sa Iloilo ang vice versa.
Kuntani suno kay Malong, magaserbe ini nga leksyon sa mga opisyal sang Guimaras nga paspasan ang ginahimo nga tikang agud mapunggan ang pagduging sang illegal drugs.