ILOILO CITY–Nagpanawagan ang Central Philippine University (CPU) Republic sa mga estudyante nga likawan ang pag panic kag magpabilin nga kalmado kasunod sang nabaton nga bomb threat.
Sa exclusive interview sang Bombo Radyo Iloilo kay John Michael Suelo, CPUR President, ginpanugyan niya sa publiko nga magsunod sa security protocol sang unibersidad.
Nagakadapat suno kay Suelo nga magsunod sa No ID, No Entry policy kag magreport sa Security Office kun may makaduluda nga bagay nga makit-an sa campus.
Nagpaandam man si Suelo nga ang pagpamahog  nga may bomba ang paglapas sa  PD1727 o Anti-Bomb Joke Law.
Una diri, nahibaluan nga isa ka nagpakilala nga “Abdul Hasser” ang nagpadala sang bomb threat sa official facebook page sang CPU sa diin, nagpamahog ini nga may yara sang bomba sa CR sang unibersidad.
Gilayon naman nga ginpabalo sang Information Center ang Administration, Security Office, kag Communications team sang unibersidad natuhoy sa nasambit nga pagpamahog.
Ginpadal-an naman sang mensahe sang CPU si Hasser kag ginpahibalo nga natukiban na ng iya identity.
Diri kag nagpangayo sang pasaylo si Hasser kag nagpasalig nga indi na magliwat.
Ginpa-blotter naman sa Jaro Police Station ang nasambit nga pagpamahog.
Natukiban nga si Hasser kag si alyas “Vic” nga nagpadala man sang bomb threat sa University of San Agustin ang isa lang ka tawo.