ILOILO CITY–Tuman ang kaakig nga nabatyagan sang ka live-in partner sang barangay tanod nga ginluthang-patay sa Barangay Calubihan, Jaro, Iloilo City.
Sa interview sang Bombo Radyo Elsie Gonzaga, live-in partner sang biktima nga si Niel Resma, iya ginpahayag nga may duha ka mga lalaki nga nakasakay sa motorsiklo nga amo ang nagtiro sa iya nga bana.
Ang duha ka lalaki ang nagasuksok sang bonet samtang ang isa naman ang nakahelmet.
Nagasinggitanan naman si Gonzaga nga pulis ukon intel ang nagtiro kay Resma.
Lima ka lupok ang nabatian sang mga pumuluyo sa lugar sang natabo ang insidente.
Samtang, suno naman kay Brgy. Kagawad Ramy Guintibano sang nasambit nga lugar, iya ginpahayag nga aktibo nga barangay tanod si Resma sa ila nga barangay.
Dugang pa niya, sa Brgy. Bakhaw, Mandurriao, Iloilo City una nga naga-istar ang biktima apang nagatinir na ini subong Brgy Calubihan, Jaro kaupod ang live-in partner .
Ginkumpirma man ni Guintibano nga drug surrenderee si Resma kag nakaparehab naman sadto.
Nakit-an man ni Guintibano nga maayo sahi  tawo si Resma sa ila nga lugar paagi sa pagaserbe nga pintor kag barangay tanod sa ila lugar.