ILOILO CITY–Patay ang ginbasansagan nga “psycho killer” sa probinsya sang Guimaras matapos ginpaarakan luthang sang wala pa makilal-an nga mga suspek sa Sitio Carig-on, Brgy. Agsanayan, Buenavista, Guimaras.
Ang biktima amo si Nathaniel Jover sang Brgy. Nazaret, Buenavista, Guimaras kag bag-o lang nakagwa sa presuhan.
Sa interview sang Bombo Radyo kay Police Senior Inspector  Jeffrey Ferrer, hepe sang Buenavista Municipal Police Station, iya ginpahayag nga madamo sang kaso ang biktima.
Bag-o ginpatay, nagpaandam pa ang biktima suno kay Ferrer  nga madamo pa siya sang patyon.
Nagapati naman ang nga mahimo nagbalos ang pamilya sang mga nabiktima sang suspek.
Gintuad man sang hepe nga nagagamit sang marijuana kag ilegal nga droga si Jover.
Samtang, gin-ako naman sang mga barangay officials sang Nazaret, Buenavista, Guimaras nga delikado nga tawo si Jover.
Suno kay Punong Barangay Reuben Laonio sang nasambit nga lugar, lakip sa mga biktima ni Jover amo ang Municipal Employee sang Buenavista, Guimaras nga ginbuno sang siyam ka beses; seaman nga ginlampusan sang bato sa ulo kag hinablos sang suspek nga duha ka tuig nga ginlamposan sang makapila ka beses tubtub mapatay.