ILOILO CITY–Ginapakamalaot sang Police Regional Office (PRO) 6 ang natabo nga pagpatay sa ginbansagan “psycho killer” sa Buenavista, Guimaras.
Sa interview sang Bombo Radyo kay  Police Superintendent  Joem Malong, taghambal sang PRO 6, iya ginpahayag nga tuman kaisog ang mga suspek nga nagpatay sa biktima nga si  Nathaniel Jover sang Brgy. Nazaret, Buenavista, Guimaras.
Ini bangud suno kay Malong, ginapatay nila ang biktima sa atubang sang madamo nga tawo sa tion sang adlaw.
Suno kay Malong, bisan nga madamo sang mga nalipay bangud napatay na ang psycho killer apang sa bahin sang  nalisdan nga pamilya, masakit sa ila ang natabo.
Gin-athag man ni Malong nga bisan indi maayo ang background ni Jover apang sa gihapon katungdanan sang mga pulis nga hatagan sang hustisya ang biktima.