ILOILO CITY–Nag-angkon sang madamu nga pilas tuga sang pagkalabo kag buno ang tigulang nga mag-asawa nga ginpatay sa Brgy. Umingan, Alimodian, Iloilo.
Sa interview sang Bombo Radyo kay Police Inspector Danilo Noca, hepe sang Alimodian Municipal Police Station, iya ginpahayag nga ang biktima nga si Mamerto Camral, 62 anyos ang nag-angkon sang madamu nga pilas tuga sang pagkalabo kag buno sa lawas.
Ang tiayon naman nga si Emma Camral, 63 anyos, ang nag-angkon sang labo sa baba, labo kag buno sa likod kag tiyan.
Kun basehan ang mga naangkon nga pilas sang mag-asawa suno kay Noca, mahimo nga may kaakig ang nagpatay sa duha.
Bag-o pa man natabo ang krimen, nagbaligya pa suno sa iya sang sapat si Mamerto Camral.
Mahimo nga gindumdum sang suspek nga may kwarta ang biktima nga nagaserbe nga ahente sa pagbaligya sang sapat.
Sa subong suno kay Noca, may person of interest na sa kaso apang limitado lamang sa hold-up ang ginasundan nga motibo sa krimen.