Manunudlo sa Passi City, makahalanusbo ang kahimtangan sang nasapwan sa sulod sang balay

ILOILO CITY–Makahalanusbo ang kahimtangan sang isa ka manunudlo sang nasapwan sa sulod sang balay sa Brgy. Gemumua Agahon, Passi City.
Sa interview sang Bombo Radyo kay Barangay Tanod Arnel Pagay sang nasambit nga lugar, iya ginpahayag nga nakabaklid, wala sang panapton, may busal kag may pilas tuga sang pagkabuno kag ginmartilyo ang biktima nga si Ma. Corazon Tionson, 55 anyos.
Ang balay ni Tionson ang malapit lang suno kay Pagay sa eskwelahan nga ginatrabahu-an sang biktima.
Ginkakibot na lang sang labandera nga si Girly Siosan nga wala ginabuksan ni Tionson ang pwertahan sang balay.
Ginhunahuna pa ni Siosan nga yara sa eskwelahan ang biktima sa diin mismo ang labandera ang nagpahibalo sa mga manunudlo nga naga-inukay na ang sulod sang balay ni Tionson.
Ginpahayag dugang ni Pagay nga ginpwersa guba ang pwertahan sang balay agud nga makasulod ang mga co-worker sang biktima.
Mas ginkakibot pa gid sang mga nakasapo nga nagahapa na kag nakabaklid ang biktima.
Didto na natukiban nga may nagkaladula na nga gamit kag gilayon nga ginpahibalo ang mga barangay official kag barangay tanod tuhoy sa natabo.