ILOILO CITY–Hugot man sa gihapon nga ginapanginwala sang 3rd year electrical technology student nga nga siya ang utok sa pagpangbuno sa pamilya Tagriza sa Brgy. San Antonio, Molo, Iloilo City.
Ini matapos nga napasakaan na sang kaso nga double murder si Rene Diocos Jr.
Sa interview sang Bombo Radyo kay Diocos, 22-anyos, tumandok sang Alimodian, Iloilo kag temporaryo nga nagatinir sa Brgy. Compania Central, Molo, Iloilo City, iya ginpahayag nga nagbulig lang siya matapos nga makita nga ginabuno sang wala niya makilal-an nga suspek si Teresita Tagriza, 74 anyos  nga napatay gid matapos makaangkon sang madamo kag patal nga mga pilas.
Sunu kay Diocos, nagabakal siya sa sari-sari store sang pamilya Tagriza sang matabo ang krimen.
Matandaan nga magluwas kay Tagriza, napatay man ang ang kabulig sang pamilya nga si Remedios Malaga, 53-anyos.
Nakaluwas naman si Julie Anne Peñafiel  kag ang duha ka tuig nga bata nga si Sveen Peñafiel.