Tatlo ka katapo sang pamilya Garin, magabunggu-anay sa pagka mamalidha sa 1st district sa probinsya sang Iloilo

ILOILO CITY–Tatlo ka katapo sang pamilya Garin ang maga bunggu-anay sa pagka congressman sa 1st district sang Iloilo.
Sa interview sang Bombo Radyo kay Mayor Oca Garin, iya ginpahayag nga siya ang maga kandidato sa pagkamamalidha bunggo sa iya anak nga si Cong. Richard Garin, anay Health Sec. Janette Garin kag anay Mayor Gerardo Flores.
Suno kay Mayor Garin, ang iya pagfile sang COC bilang independent candidate ang pagfile man sang COC sang iya umagad nga si anay Sec. Janette Garin sa idalom sang Nacionalista Party sa amo man nga posisyon ang kabahin lamang sang ginatawag nga “flexibility” sa patag sang pulitika.
Ini bangud nga suno kay Mayor Garin, wala pa sang pinal nga desisyon ang ila pamilya tuhoy sa 2019 elections kag ila pa nga ginalantaw ang reaksyon sang pumuluyo.
Ginpahayag sang alkalde nga indi sila magbunggu-anay sang iya bata nga si Cong. Garin bangud nga wala pa man ang substitution period sa diin mahimo pa nga maka-withdraw ang iban sa ila pamilya.
Kadungan sini, gin-athag ni Garin nga wala sang away sa tunga sang ila pamilya.
Si Congresswoman Sharon Garin ang madayun sa pagkandidato agud nga mangin AAMBIS-OWA Partylist representative.
Una na nga ginpahayag ni Mayor Garin nga mahimo man siya nga magpare-elect bilang alkalde sang Guimbal kag mahimo man niya nga dayunon ang pagkandidato sa pagkamamalidha.